مدونة
This article is also available in
.
Switch Language
أشياء ممكن تعملها مع أطفالك بعمان
كل يوم وخاصة بعطلة نهاية الأسبوع بنقعد نفكر ايش ممكن نعمل إشي مسلي مع الأطفال، اشي غير التلفزيون والعاب الكمبيوتر اللي بتاخد كل وقتهم وما بيستفيدو منها، في بعمان كتير أماكن مفيدة ومسلية ممكن الأطفال يقضو فيها وقت لطيف.
مؤسسة عبد الحميد شومان/ درب المعرفة
درب المعرفة مش بس مكتبة، هي مكان مناسب للأطفال من كل الأعمار وبوفر أنشطة كتير، منها قرائية وإبداعية زي قراءة القصص والدورات وورش العمل والأندية الصيفية والشتوية، واللي بتحفزهم على صقل مهاراتهم وقدراتهم، وهي مناسبة للأطفال من عمر 3 سنوات ل 16 سنة، ورسوم التسجيل مش غالية أبداً.
مركز زها الثقافي
هالمركز بوفر خدمات كتيرة هدفها تنمي قدرات الطفل على الابداع في حياته، لأنه فيها كتير فعاليات زي المهرجانات والاحتفالات، وتعليم الفنون المختلفة زي الموسيقى والدبكة، إلى جانب عدد من الأنشطة العلمية.
مركز هيا الثقافي
هالمكان أكيد رح يحبوه الأطفال ففي كل شهر بوفر المركز دورات مميزة للأطفال زي الشطرنج والموسيقى والزخارف والغناء والأعمال اليديوية والطبخ والأنشطة العلمية، وكل نشاط محدد لأي أعمار، وبأسعار مناسبة للجميع.
زيارة الحدائق العامة
أكيد كلنا بنحب نطلع مع الأطفال بدون م نصرف كتير مصاري في المولات والمطاعم، وفي عدد من الحدائق بعمان ممكن ينبسط فيها الأطفال أكتر من المولات، زي حدائق الحسين، وحدائق تانية صغيرة زي حديقة الديار وحديقة بنك الإسكان والحديقة اليابانية بعبدون.