أشياء نحبها
This article is also available in
.
Switch Language
مطعم ماليزي بقدم أكل للآجئين والفقراء بعمان ببلاش
مطعم مكانه عند الدوار السابع في عمان وإله فرع تاني بإربد واسمه نور ماليزيا هو تابع لمؤسسة خيرية ماليزية موجود زيه بأكتر من مكان في العالم ، الفكرة من وجوده كتير حلوة وبتنفع أكتر من حدا أولهم الطلاب الماليزين اللي اختاروا الأردن عشان يكملوا دراستهم بالعربي أو بالدين وعشان هالمؤسسة تدعمهم فتحت هالمطعم منه بيشتغلوا فيه وبتعاملوا مع الناس وبستفيدوا كلغة ومنه بأمنوا مصاريف دراستهم ومش بس هيك اللي بيضل من الصندوق بيقدموا منه وجبات للآجئين الفلسطينيين و السوريين بالمخيمات وحتى بعض العائلات الاردنية ممكن يلحقها الدور .
جوّه المطعم في أكل ماليزي تقليدي وفي منتجات ماليزية مجمّدة فالناس اللي بتزوره ممكن ياكلوا في المطعم أو حتى يمونوا لبيتهم وزوّاره من الجاليات الماليزية اللّي ساكنة بعمان أو حتى الفلبينية لأنه تقريبا أكلهم بيشبه بعض وممكن أردنيين عاشوا بماليزيا أو حتى أردنيين مستعدين يجربوا أي طعم جديد مع حبهم لعمل الخير.
إزا حبيت تجرب المكان أول ما حتدخل رح تشوف عينات من اللّبس التقليدي الماليزي وصور لأصحاب الخير اللّي عملوا هالمكان ورح تلاقي اللّي بيشتغلوا هناك بوجوه بشوشة بستقبلوك وغير النضافة والترتيب والخدمة بالمكان رح يلفت نظرك شويّة تفاصيل كتير حلوة زي عبارة محطوطة فوق البوفيه وفيها “ازا بتحب تاكل عنا من البوفيه المجاني بتقدر بس لازم تخلص صحنك وإزا أخدت منه إشي وما أكلته لازم تدفع حقه” وهيك كب الأكل من البوفيه تبعهم معدوم وبيعطي دروس للرّحمة ومساعدة الناس وممكن نوخد أولادنا عليه نعلمهم كيف ممكن يساعدوا غيرهم وكيف يجربوا أكل جديد ويتقبلوا ثقافة الناس التانيين.