أشياء نحبها
٦ من أشهر كافيهات وسط البلد
لما تكون في منطقة وسط البلد، لازم تعرف أهم الكافيهات يلي رح تتسلى فيها وتقضي أحلى الأوقات مع أصحابك.
١. زجل
ما حدا ما بيعرف درج الشماسي في وسط البلد، وهالمطعم بجنب درج الشماسي، مميز بديكوراته الفخمة والمريحة بنفس الوقت، وقائمة الأكل عندهم متنوعة وشهية. ولتحلى القعدة في الصيف، في بلكونة بتطل على الشارع الرئيسي وحديقة خارجية مفتوحة على السما كلها ورد.
٢. أمسيات عمان
موجود في شارع الأمير محمد، بيتميز بديكوراته المعتقة، وعلشان زيادة الرواق جرب قعدة الترس أو القعدة في البلكونة. المأكولات والمشروبات لذيذة جدا، وسهرات العود بتحلي المكان في ليالي الخميس والجمعة.
٣. جميدة خانم
أجواء شبابية مليانة حب ومرح، استمتع بأجمل العروض الغنائية الارتجالية يوميا من وقت المغرب لنص الليل، عدا عن الأكلات يلي فيها لمسات خاصة شهية، والديكور المليان ألوان.
٤. جفرا
مقهى تراثي واسم أشهر من نار على علم، كل شي فيه مميز سواء القهوة أو باقي المأكولات والمشروبات، خاصة إفطار يوم الجمعة عندهم غير.
٥. عفرا
إطلالة مرتبة على منطقة وسط البلد، المطعم واسع وأنيق، وبتحتار شو تختار من قائمة الطعام يلي بيوفرها المطعم.
٦. حكاية بلد
قعدات بتتميز بالبساطة والأناقة والألوان المشرقة، بوفيهات أكل رائعة، وقعدة خارجية ما رح تندم على تجربتها.