مطاعم ومقاهي
ليه مطعم هاشم؟
يعتبر مطعم هاشم من المعالم الأساسية الأصيلة في العاصمة الأردنية عمان، وتحديدا منطقة وسط البلد. هالمكان استضاف كتير ناس وأجيال من أهل الأردن ومن مختلف المستويات الاجتماعية، عدا عن السياح والجروبات السياحية اللي لما مرت عليه وأكلت فيه شعرت بتميزه، مشان هيك رح نحكي ليه مطعم هاشم؟
لأنه أكلاته شعبية شهية ولذيذة وريحتها بتفتح النفس، وهي عبارة عن حمص وقدسية ومسبّحة وفول وفلافل، يعني رح تاكل وتضل شبعان لساعات طويلة، ومناسب طبعا للأشخاص النباتيين.. عدا عن كاسة الشاي بالنعنع الطازة والمشروبات الباردة وإذا بدك تكملها بتحلاية بتوصلك لعندك.
لأنه المكان معروف بنضافته وقعداته البسيطة، قعدة خارجية بتطل على الشارع الرئيسي بطاولات وكراسي بلاستيك، ووحدة تانية داخلية بتشبه الخارجية، ديكوراته بسيطة ومريحة.
لأنه يعتبر تراثي، بيقدم وجباته من أكثر من 60 سنة، وبنفس جودة الخدمات، طاقم العاملين فيه مستعدين لتلبية طلباتك بسرعة وسلاسة وبكل حب. ومش بس هيك، أسعاره معقولة ومناسبة للجميع.
كمان جذب المكان عدد من الشخصيات المعروفة، على رأسها الملك جلالة عبدلله الثاني وزوجته الملكة رانيا، وكمان شخصيات سياسية وفنية استمتعت بأجواء البساطة والحفاوة والتكريم في هالمطعم.