أشياء نحبها
أماكن شغل تصوير وphoto sessions
إذا عندك تخريج أو خطبة أو أي مناسبة أو بس حابب تتصور بمكان حلو للتصوير، هاي أفضل أماكن عامة ممكن تتصور فيها بعمان…
١. حديقة زهران
هي حديقة عامة موقعها في شارع زهران بين الدوار الثالث والرابع، حديقة هادية وصغيرة وبتنفع للتصوير، ودخولها مجاني. وبتفتح الحديقة للساعة ٨:٣٠ مساءً.
٢. جبل اللويبدة
جبل اللويبدة من أقدم الأماكن في عمّان، وشوارعه القديمة وأدراجه الملونة كتير مناسبة للتصوير، ولانه جبل ففيه إطلالات حلوة بتطل على جبل عمان وجبل القلعة وشغل تصوير أفلام و سكيتشات. غير انه كمان في كتير أعمال جرافيتية على جدران مبانيه واللي بتساعد على التصوير.
٣. جبل عمّان
جبل عمّان كمان من أقدم المناطق في عمّان، وبيمتاز بشوارعه القديمة والمحدّثة من أمانة عمّان بنفس الوقت. شارع الرينبو والإطلالات الموجودة بآخره والمباني القديمة كلها أماكن حلوة للتصوير.
٤. جبل القلعة
مكان أثري موقعه تقريباً في وسط البلد، مكان واسع وحلو جداً للتصوير لانه فيه آثار وبيطل على عمّان كاملة وخاصة وسط البلد والمدرّج الروماني. المكان بيفتح للساعة ٦ المسا بالصيف ورسوم دخوليته ربع دينار للأردني.
٥. حديقة المتحف الوطني الأردني للفنون الجميلة
موقعها في جبل اللويبدة، حديقة صغيرة وفيها تماثيل ومنحوتات وحلوة لتصوير جميع المناسبات.