أشياء نحبها
مادبا…سياحة ولا أحلى
هالمقال عبارة عن جولة سريعة في محافظة مادبا أو مأدبا الأردنية الرائعة والعريقة، لنتعرف على أهم الأنشطة والأماكن السياحية فيها.
١. وادي هيدان
موجود في محمية الموجب، مكان ساحر بكل معنى الكلمة، مليان بشلالات والمسطحات المائية، بيجذب متسلقي الجبال ليستمتعوا بالمرتفعات على جنبات الوادي، فيكم تشوفوا الأرانب والبط وأصناف كتيرة من الطيور المهاجرة، عدا عن الحصيني وغيره من الحيوانات.
بتزيد المزارع الموجودة في المنطقة من جمال هالمكان، وممكن لمحبي الرحلات التخييم والاستمتاع بمنظر السما الصافية بقمرها ونجومها.
٢. جبل نيبو
مادبا هي أقرب محافظة لهالجبل، ويلي إله أهمية تاريخية وقدسية في الديانات الثلاثة: المسيحية والإسلامية واليهودية. من هالمكان بإمكانك تتأمل كتير أراضي ومناطق، من بينها الأراضي الفلسطينية وتحديداً مسجد قبة الصخرة وأبراج كنائس القدس، وفي الشمال جبل الشيخ، وممكن تشوف البحر الميت ومرتفعات البلقاء لما تكون السما صافية.
٣. خريطة الفسيفساء
موجودة في كنيسة جورج للروم الأرثوذكس، وهي أقدم خريطة للأراضي المقدسة من القرن السادس الميلادي، تصميمها متل الرسم الجرافيكي الحديث بسبب إبرازها لبلدات صغيرة ومناطق متنوعة لكن بحجارة ملونة وصغيرة هي الفسيفساء!
٤. مطعم مراح سلامة
أنشؤه المهندس الأردني جورج حدادين في قلب كهف! وهاد بسبب شغفه بالتاريخ الأردني وأهميته وتحديداً الكهوف. المطعم بيقدم مأكولات شرقية لذيذة، فيك تستمتع بأكلها بين جدران صخرية موغلة في التاريخ، وتشوف شو موجود تحتك لأنه أرضيات المطعم زجاجية!
طبعا الحكي هون مختصر، لأنه مادبا بأهميتها الدينية والتاريخية كل المقالات ما بتوفيها حقها.