مدونة
احمد سميري

لكل محبّي الكتب و القراءة بعمّان

لكل محبّي الكتب و القراءة بعمّان, يلا جهزو حالكم! معرض عمان الدولي للكتاب ببلّش هالخميس 26 ايلول و بيخلص 3 تشرين الاول. المعرض رح يكون بقاعة معرض عمان للسيارات عطريق المطار ورح يحضرو دور نشر من 22 دولة عربية واجنبية. رح يكون في ندوات شعرية وفكرية وثقافية وفعاليات كثير لجميع الفئات العمرية, فاذا بدكو تشجعو ولادكم عالقراءة هاي فرصتكم.



المعرض رح يكرّم الشاعر و الكاتب الاردني القدير أمجد ناصر. أمجد وصل للعالمية بكتاباته الشعريّة زي ” سُرَّ من رآك” و”رعاة العزلة” و اعمال كتير اترجمت لكتير من اللغات, و بمساهمته بتأسيس صحيفة القدس العربي وغيرها من الاعمال الثقافية. ربح أمجد ناصر كثير من الجوائز آخرها جائزة الدولة التقديرية في مجال الآداب من الدولة الاردنية.



كمان رح يكون حفلات توقيع كتب كتير منها رواية “بنت الخيّاطة” للكاتبة اللبنانية جومانا حداد نهار الخميس 3 تشرين الاول بجناح دار الاهلية بين الساعة 6 و 8 مساءً, وكتاب “غاسل صحون يقرأ شوبنهاور” للكاتب الفلسطيني محمد جبعيتي اللي بيحكي عن الواقع الفلسطيني بعد اتفاقية اوسلو يوم السبت 28 ايلول بجناح دار الآداب الساعة 4.