مطاعم ومقاهي
This article is also available in
.
Switch Language
على مدار الساعة: ٩ محلات فاتحين ٢٤ ساعة بعمان
بغض النظر عن التزامك بصحتك و بنصائح مهندسين التغذية، لما ييطُّب عليك الجوع بنص الليل رغم كل الظروف رح تمسك حالك و تدوّر ع محل فاتح ليلبيلك رغباتك. عشان نسهل عليك المهمة، سردنالك كم محل ع ذوق الجميع فاتحين ٢٤ ساعة طيلة ايام الاسبوع:
١. باباز
لازم تجرب البوريتو و الشميشانجا دجاج بهالمطعم اللي ببيع هامبرجرات و اكل مكسيكي بعبدون.
٢. شاي و نعنع
بأفرعه عبدون و شميساني، جرب منقوشة جبنة العكاوي او اذا بدك تجرب طعم جديد، منقوشة الفيتا المتبلة مع نَفَس ارجيلة و اكيد اطلبلك شاي بنعنع. اسم ع مسمى.
٣. زعتر و زيت
فاتحين بشارع مكة، دابوق و بوليفارد العبدلي. هالمحل معروف بالرابس الطيبين. جرب الكفتة راب او التركي راب ليعبيلك بطنك بتالي الليل.
٤. ورد و كباب
مشاوي، ورق عنب و كوسا بالريش، زغاليل… الاكل الشرقي الاصيل موجود بشارع الوكالات.
٥. الترويئة
فرع وحيد بالرابية فاتح ليقدملك ازكى المزّات العربية. اطلب و ذوق ع كيف كيفك.
*المحلات الجاية مش فاتحين ع مدار الساعة بالحرف الواحد بس شبه فاتحين صبّاحي:
٦. ابو جبارة
من ال٥ صباحا حتى ال٢ صباحا.
في كثييييير افرع بس فرع واحد منهم الاصلي، بشارع المدينة المنورة. اطلب فتة الحمص و كم حبة فلافل و رح يتوصّوا فيك بالخبز الطازج اللي بنزللك بغلي غلي.
٧. بي سناك
من ال٩ صباحا حتى ال٤ صباحا
مطعم بفرعين؛ شارع المدينة المنورة و بالفحيص. عندهم سندويشات و عصائر طازجة و حاجات غريبة بس لذيذة. اطلب الزنجر مع عصير منجا هندي (منجا و جوز هند و بهارات عجيبة).
٨. شاورما ريم
من ال ٩ صباحا لل٣ صباحا
شاورما. لحمة. و زيد البصل لو سمحت.
٩. باشكا
من ال١١ صباحا لل٣ صباحا
شاورما بخبز تخييييين. اطلب باشكا الفطر و الكريمة بالجبنة.