لغة الدواوين الاردنيين

تعريف الشخص الدواوين او الديونجي هو العَتعُوت القديم بالصَنعة. ممكن يكون ميكانيكي، مواسرجي، شوفير تاكسي او بنت حَسَن صبي. بتميزوا باللهجة اللي بتمُطّ و معروفين بتركيبة جُمَل و مفردات فريدة من نوعها، اهمها:

١) بالحديد و لا بالعبيد: يقال للي عامل حادث سيارة و الحمدلله نجا منها بس السيارة تضررت

٢) كبير يا…: يقال كنوع من الاعجاب للشخص اللي عاملّه عمله منيحة

٣) ولو ع حسابك: هاي بتنحكى لحدا عاجبك لِبسه او اشي بمتلكه. لا تاخدها بالحرف الواحد لانه اكيد ما رح يعطيك ياها و يُفضّل تجاوبه ب “حلوة ع صحابها”

٤) ما بَزِلّ عليك: هاي بتسمعها بعد ما يعرطله عرطة كبيرة (يحكيلك كذبة كبيرة) و المقصود منها انه ما بكذب عليك

٥) انا حاطِط ابليس بكيس و قاعد محلّه: هاد خاف منّه لانه مقلِّع و مش فارقة معه

٦) اطلع من راسي و سكر الباب: ابعد عنه فوراً

٧) دَندَرة: يعني الدنيا قايمه قاعدة

٨) عراسي كَزدرة: بحبك يا…

٩) ماكل مناغيش عالصُبُح: يقال للشخص اللي مفكر حاله نِغِش و بينَهِّف

١٠) بتلعب بعدّاد عمرك: هاد بنحكى للشخص اللي نافِش ريشه و شايف حاله، فدير بالك ع حالك

١١) بتهوَّاله بقشرة بِزِر: يقال عن الشخص اللي بيعصّب بسرعة

١٢) منشِّف ريق البنات: يقال عن الشب الدونجوان – هارون الرشيد ما شاء الله عليه

١٣) شَحَدنا الملح: هاد الشخص طفرااااان عالآخر

١٤) جلِّس و اعطي لَمعة: انسحب و اسكت بس تسمعها لأنك شِكلك عكّيت بكلمة ما عَجبته

١٥) و شرفي بريّح امك من غسيل اواعيك او عمرك شفت راسك عصدر منسف او بسوّي منك عشرة صغار: تهديد.

١٦) روق يا بَرقوق: انساك من بَرقوق، اصلا مين بَرقوق؟ انت بس روق

١٧) اوطى من الشفرة عالارض: صفة غير مستحبَّة. في اوطى من هيك؟

١٨) اعطيني على طواحيني: هاي تقال لما تحكي للشخص قصة حلوة او تجيبله اشي حلو

١٩) اكلت راسنا: شو ما كان الحكي اللي عم تحكيه، وقِّف لأنك عم بتعيد و بتزيد و بَلَّش يقرف الشخص اللي بسمع

٢٠) حِلّ عن سَمَاي بلاش اجبِدَك خُماسي: يا حبيبي، ابعد عنه بلاش تاكل كف محترم ع خدك