مدونة
شامان العبداللات

٧ حركات بعملها الاردني بس يسافر او يتغرَّب

مش معنى اذا بنحب نسافر يعني ما بنحب بلدنا. كلنا بنحب الاردن واللي فيها بس للأسف ما بنطَبِّق قوانينها مقارنة بلمّا نسافر ع بلدان ثانية. و هون رح نِطرح الفروقات بين الاردني بالاردن و الاردني اللي برّا بلاده:

١) الكلام:

بيطلَع مواهب الاردني الانجليزية بس يسافر. مع انه عدد المتكلمين باللغة الانجليزية كبيرة بالاردن، بس في كثير بيستحوا يحكوا بلاش ما حدا يجي يتخوَّث عليه، اما برّا البلد، محتاج يِظهِر هالمواهب و القدرات ليعيش.

٢) العملات:

بنظرنا كل شي غالي بالأردن و بنسترخص نشتري اشي عندنا إلا للحاجة. اما التسوق برّا غير، ما عندهم ضرايب و الغالي بيصير رخيص.

٣) الاكل:

هون الأردنيين بنقسموا قسمين: قسم بيحب يدلِّع حاله ببلاده و بيدوِّر عالاكل رخيص، معروف و مفهوم برّا البلد. و قسم بخيل ع نفسه و ولا يمكن ياكل بمطاعم و لما يسافر بيدوِّر على افخم المطاعم الفاخرة اللي بعرفها و اللي ما بعرفها ليجرِّبهم.

٤) المواصلات:

بعُمرك ما رح تشوف اردني بِمشي من مكان للثاني بعمّان، بنفضِّل نركب السيارة لنوصل الدكان. اما لما نسافر، مستعدين نمشي ساعات من مكان للثاني ولا بِنفكر ناخذ تكسي يوصلنا، منه بنِكتشف البلد اكثر(حِجّة الجميع) و منه ما بنصبوا علينا شوفيرية التكاسي (الحِجّة الحقيقية).

٥) الطبيعة الخلابة:

بتنصدم انه بالأردن مناظر بتجنن و طبيعة بتاخذ العقل بس الحكي للي بيروح و بيزور المناطق هاي. اما برّا البلد بنمضِّي ايام رحلتنا نتطَّلَع ع طبيعة غيرنا و ساعات ايامنا ناخذ صور لهالطبيعة. الله وكيلكم بِتنَزَلوا كل الصور دور واحد ع مواقع التواصل الاجتماعي و بنحذفوا من الموبايل ع طول – يعني بس عشان نوَّرجي الناس.

٦) اللبس:

الأردني بالبلد بلبس حسب الأصول خوفا من كلام الناس و بالأخص اهله و قرايبه اما بحال السفر، كل هالكلام بيختفي و بياخذوا راحتهم عالآخر.

٧) القوانين:

اكيد لاحظت المشكلة بالسواقة بالاردن، ما ناس بمشي عالقانون و للأسف في ناس بترمي زبالتهم بالشارع عكس لمّا يكون متغرب بيصير يلبس حزام الامان و حتى بيقوم باعادة تدوير نفاياته و غيره الكثير.