مطاعم ومقاهي
This article is also available in
.
Switch Language
١٢ طبخة من اصول اردنية
الطبخات التقليدية الشعبية جزء رئيسي من ثقافة اي بلد و ناسه. وكلنا بنعرف انه الطبخة الاردنية التقليدية هي المَنسَف، و لا غنى عنه. بس اللي ممكن ما بتعرفوه انه في طبايخ اردنية شعبية كثيرة غيرها ممكن الواحد يستلِذ فيهم كمان، و منها:
١) المجلَّلَة:
طبخة مشهورة لأهل الجنوب (الكَرَك، الطفيلة و معان)،مكونة من فتافيت الفطّير او الغلاسي (خبز بلدي مش مختمر بشبه خبز الطابون) و منغّنغّ بالتَشريبة (لبن جميد). ممكن تضيف لحمة او جاج عليها و مكسرات مقلية بالسمن البلدي حسب الرغبة.
٢) الرَشيدية:
هي المجلَّلة بس بنضيف عليها جِريشة (حبوب القمح الناعم)، عدس و حمّص حب. هون بتنسى الجاج و اللحمة.
٣) المشوَّطة:
هي المجلّلة مع عصير بندورة بالنص. عصير البندورة هاد اخت قلّاية البندورة بالزبط، المجلّلة بتيجي داير من دار قلّاية البندورة.
٤) الرَشوف و المَدقوقة:
طبخة مشهورة فيها اهل الوسط (بالذات البلقاء و السَلْط) و هي مكونة من مَريس لبن الجميد، جِريشة و عدس. يعني ممكن تحكي عنها شوربة مَنسَف بالعقل.
٥) المَكمورة:
مشهورة عند اهل الشمال (جَرَش، عجلون، اربد و الرمثا) و هي عبارة عن اصفاط من رقائق عجين القمح البلدي، الدجاج المبهّر المقلية بالسمن البلدي فوق بعضهم ليصير طبق واحد مشوي. يعني لزانيا اردنية عالاصول. و مصغر هاي الاكلة تسمى مطابِق.
٦) الرِقّاقَة:
هاي الطبخة عبارة عن عجينة خبز تُرَق ع سدر لرقائق رفيعة و بنقطعها ع شكل خيوط رفيعة بعد التخبيز. يُدارعليها لبن جميد و سمن بلدي و هيك بتكون خلصت ابسط طبخة بالعالم. بس زَبِّط الخبز بالاول.
٧) المَقطوعة:
كلاوي و كبد مقلية بالسمن البلدي و البصل، معروفة بعد كل ذبيحة بتنذبح بالدار.
٨) كعاكيل (و تُلفظ: chعاchيل):
طبخة قديمة مكونة من طحين القمح، بيض و نبات الجَعدِة مخلوط ببعضه و مشَرَّب بلبن الجميد.
٩) الهيْطَليه:
حلو اردني مكون من خُلاصة القمح (نشا القمح)، حليب و سكر و بالنهاية بِندير عليه فستق حلبي و سمن بلدي. بأيامنا الحالية بِنقَدِّم الكنافة بالافراح و المناسبات، بس ايام زمان كانت الهيطليه ماخذة مَجدها.
١٠) البكيْلَة:
حلو اردني عبارة عن قمح مطحون و مغلي بالماء و السكر، بِنضاف عليه زبيب مقلي بالسمن البلدي و يُرَش بجوز الهند. كانو يقدموها بسهرات الاعراس ايام زمان و عند الولادة.
١١) اللَزّاقِّية:
حلو مشهور عند بدو الوسط و يطلق عليه كنافة البدو، مكون من عَويْص (خبز بلدي مش مختمر مخبوز عالصاج) مقطَّع لقِطَع صغيرة، بتشَرَّب بالسمن البلدي و يُرَش بين كل قطعة و قطعة السكر. يُقَدَّم مع تغميسة سمن بلدي عالجنب.
١٢) الخبيصة:
حلو مشهور عند اهل السَلْط، عبارة عن عصير عنب مصَفَّى يُغلى مع طحين وقُرّيش (الحبة السودة او القِزحة) و يُنشَر ع حبل الغسيل حتى ينشَف. Fruit Loops سَلْطي.