15 لعبة مش ممكن تِنتسى من ذاكرة الاردنيون

ما في احلى من ايام الطفولة، و الالعاب اللي كنا نلعبها… العاب ما خصها ابدا بال بلاي ستاشين وال اي باد، العاب كنا نتعرف فيها عأصحاب جداد.

هي احلى ١٥ لعبة كُنّا نلعبها.

١- الجلول

الجلول هيَّ عبارة عن كرات زجاجية صغيرة ملوَّنة، بلعبوا الاولاد فيها بالحارات بعَمِل حفرة بالتراب.. و اللي بيفوز بتدخيل الكرة بالحفرة بجمع جلول لاله .

٢- بيت بيوت

كلنا و نحن صغار كنا نجيب الالعاب و نعمل حالنا ام و اب الهم و مش بس هيك .. كنا كمان نحكي و نلعب معهم. ياما اهالينا فكَّروا انه كنا نحكي مع حالنا و اكتشفوا بعدين انه كنا نحكي و نلعب مع الالعاب.

٣-ليلى يا ليلى

رح يفهم قصدي مواليد التمانينات و التسعينات.

٤- غميضة

بيلف اللاعب وجهه عالحيط و بِيَعِد للعشرة ، بينما بتخبوا اللاعبين التانيين ، و بس يخلص عَدّ ببلش يدور عليهم و يزقطهم.. ياما تخرمشنا و نحن منلعب هاللعبة.

٥-الدومينو

هاللعبة بالذات كُنّا نلعبها مع جدودنا ، و تسحب القعدة ساعات و ساعات و هِنَّ يِلعَبوا و يحكوا عن ايام زمان.

٦- الشدة

لحد هلا القعدات الحلوة و الطويلة ما بتكمل غير بالشدة و العابها اللي ما بتخلص ، زي الباصرة، الهاند ، اونو.. و غيره.

٧- الحاكم و الجلّاد

منستعمل فيها اربع ورقات مغلقة مكتوب عكل وحدة فيهم : حاكم ، جلّاد، مفتش ، لص. بحاول المفتش انه يعرف مين اللص و يحكم عليه بعدد ضربات بالمسطرة.

٨- XOXO

عادةً كنا نلعبها بالطبشورة عالارض.. و بالمدرسة بين الحصّة و التانية.

٩- لعبة الكراسي

بيكون في لاعبين اكتر ب عدد واحد عن الكراسي ، و بيبلشوا يتسابقوا مين رح يلحق يقعد عالكرسي،، و اللي ما بيضل اله كرسي بيطلع برّه اللعبة.

١٠- شد الحبل

كنا نعمل فريقين ، و عالاغلب كان يكون فريق بنات و فريق اولاد و طبعا الاولاد كانوا يفوزوا.

١١- لعبة الحجلة

كنا نرسمها عالارض بالطبشورة و اذا لمس الحجر المربع او اذا نحن لمسنا المربع بدنا نعيد من اول و جديد.

١٢- حرف، اسم ، حيوان…

ياما المعلمين لقطونا و نحن منلعب هاللعبة بنص الحصة اللي منِكرَهّا .. بس عن جد تعرفنا عاسامي بلاد و حيوانات و نباتات جديدة منها.

١٣- الطائرات الورقية

ياما طَيَّرنا طائرات ورقية ملونة بالوان مختلفة عالاسطح و خاصة بالاجواء الربيعية و الصيفية. كنا نجتمع مع اولاد الجيران و نروح كلنا انطَيِّرهم.

١٤- طرّة ولّا نقش

كنّا نلعب بقطعة نقود معدنية و نصير نحَزِّر بالناس اذا طُرّة او نقش ( صورة ولّا كتابة) و اللي بيفوز ، بيفوز الرهن اللي متراهنين عليه.

١٥- نط الحبل

من احلى الالعاب و الرياضة اللي كنّا نلعبها نحن و صغار..طبعا البنات اشطر كتير من الاولاد .