مطاعم ومقاهي
أحسن أماكن تشرب فيها قهوة بعمان
عشاق القهوة ما بيرضو بأي كوب قهوة، لأنه القهوة لازم يكون إلها أجواءها ولازم تكون معمولة بإتقان رح نورجيكم وين تشربو أزكى قهوة بعمان واللي رح ترضيكم لو كنتو من محبين القهوة.
Espresso Lab
كافيه Esspresso Lab موجود بضاحية الأمير راشد وهو من أهم الوجهات لو بتحب القهوة، وفيه طاولات كبيرة لو بتفضل تقعد مع أصحابك أو تدرسو أو تشتغلو سوا، وفيه قسم للمدخنين وقسم لغير المدخنين لكن ما بوفر الأراجيل.
Almond Coffee House
Almond Coffee House في إله فرعين بعمان واحد بالرابية وواحد بشارع مكة، والقهوة فيه ممتازة، وأنواع الحلو زي الدونات بالنوتيلا والأكلات الخفيفة والسلطات عنده كمان رح تعجبك وأسعاره مش كتير غالية.
Rumi Cafe
مقهى رومي من ألطف الكافيهات الموجودة في عمان في منطقة شعبية وحيوية، واللي بيلتقوا فيه محبين الفن والموسيقى لأنه مكان مميز بخليك تحب تشتغل لأنه الكل حواليك بكون حابب اللي بيعمله، والأهم من هاد كله القهوة اللي ما رح تندم أبداً لما تجربها!
Alchemist Coffee House
هاد المقهى موجود قريب من إشارة السابع، المميز بهاد المكان إنه مريح وبوفر أنواع القهوة كلها بجانب عدد من أطباق الحلو والأكلات التانية، وهو مناسب للشغل والدراسة وحتى لقاءات الأصحاب، والخدمة عندهم رح ترضيك عالأكيد لأنهم بيهتمو كتير بالزبائن.