مدونة
اكتر ٣ جمل رح تسمعها لما يتغير التوقيت من صيفي لشتوي او العكس
متل كتير من الدول، من سياسات بلدنا انه التوقيت يتغير مرتين بالسنة، ببداية الشتا وبداية الصيف. مع انه هالأشي سنوي من اول ما وعينا ع الدنيا، إلا انه في جمل روتينية ويمكن مرات فكاهية لازم تسمعها لما يتغير التوقيت من صيفي لشتوي:
١. اقدم الساعة ولا ارجعها؟
هاد السؤال اله حس فكاهي اردني بتميُّز، لانه جامع بين الجدية والمسخرة بنفس الوقت، وعشان تحس حالك بالأردن لازم تسأل هاد السؤال باليوم اللي بتغير فيه التوقيت.
٢. رح تنام ساعة زيادة.
هالجملة لازم اسمعها من أبوك وأمك كل ما تحكيلهم نعسان/ه، لازم يحسسوك بقيمة تغيير التوقيت لشتوي وبإنك رح تنام ساعة زيادة من وجهة نظرهم مع انه ما بتفرق بوجهة نظرك لانه هيك هيك رح تنام و تصحى حسب ساعة جسمك البيولوجية مش حسب ساعة الحائط.
٣. راحت علي نومة!
هاي حجة كل واحد اتأخر على دوامه اول يوم دوام بعد تغيير التوقيت، وبصراحة هالحجة قوية ومقنعة وصعب تناقش فيها…