مطاعم ومقاهي
This article is also available in
.
Switch Language
١٠ مطاعم فخمة بعمان ليومك الفخم
في كثير مرّات بتحتاج لمطعم مرتّب تروح عليه سواء عازم صحابك، حبايبك او حتى وفد جاي من برّا. محل يرفع الراس و يبيِّض الوجه. هالمحلات ما رح يخيّبوا ظنّك:
١. مطعم فخر الدين – الدوار الثاني
مطعم شرقي بأسلوب مختلف وراقي. جرب رجلين ضفادع مطفية بالليمون.
٢. مطعم ليفانت – الدوار الثالث
مطعم ارمني كتكوت و مرتب. نزّل سيخ الشاورما الصغير و ما بتندم.
٣. بيت عمر – خلدا
بجنن بالصيف و مكنكن بالشتا. استمتع بشوت ”shot“ الرشوف و ادعي يكون عمر العبداللات موجود يغني.
٤. روميرو – بين الدوار الثالث و الثاني
رومانسي بَحْت بيقدملك اكل ايطالي اصيل. جرب الريزوتو بالفطر.
٥. فينيجريت – شميساني
عالسطوح، هالمحل عنده مَطَل (فيو) من الآخر. اطلب اللوبستر و ادعيلي.
٦. يوشي – الدوار الثالث
مطعم ياباني رايق عندهم سوشي بقتل. اسألهم عن السوشي المخفي من المنيو لانه المخفي دايما ازكى.
٧. لا كابيتال – فندق فور سيزونز
محل فرنساوي شيك لدرجة لا توصف. فيليهات بتشهي.
٨. ٣٢ نورث 32 North – فندق حياة عمّان
خفيف و لطيف، عندهم مأكولات بحرية بأطعمة مبتكرة. غمس ايديك بالباربكيو جمبري.
٩. ليفينغ روم – بين الدوار الثالث و الثاني
من اسمه، بتحس حالك بالبيت من كُثُر ما هو مريح. نزّل ستيكات، برغرات، اللي بدك ياه و روِّق.
١٠. لوكا – الدوار الثالث
مطعم بيرَجعَك ع اسطنبول. لا تخاف من الثور اللي عالباب، هاد منظر. نزّل لوكا ستيك بالزبدة.