أشياء نحبها
This article is also available in
.
Switch Language
٧ مغامرات لتعيش اللحظة جوا الاردن
سواء بتدرس او بتشتغل، كلنا بنزهق من الروتين و نِفسنا نغير من نمط حياتنا لو يوم. مش دايما بتقدر تضب اغراضك و تطلع برا البلد و تغير جو مع انه الواحد بيكون محتاج هالشي. لتغير من الروتين الممل، جرب شي جديد و غامر جوا الاردن و ممكن تكتشف شي جديد عن حالك ما كنت متوقعه.
١. رحلات صحراوية
قيادة سيارات البوغيز Buggies في رم، الغطس بالماء في العقبة، التسلق في وادي موجب، التخييم في ضانا و غيره الكثير… و عشان نساعدك ممكن تستعين بصديق و ترن ع ادفنشر بروز Adventure Pros و بيلفلفوك وديان ما سمعت عنها بعمرك.
٢. درب الاردن
٦٠٠ كيلو ب٣٦ يوم من ام قيس للبحر الاحمر. امشي ع طول الاردن من راسها لساسها.
٣. رم بالون
سُكُون و سُكُوت… هاد احلى شعور رح تحسه و انت بتحلق فوق وادي رم و بتتطلّع ع مدى من الصخور الخلابة و اعمدة الحكمة السبعة و الكثبان الرملية من بعد ٦٠٠٠ قدم عن الارض.
٤. نادي الطيران الشراعي الملكي الاردني
في فترة من الفترات حلمنا نصير طيارين. و هاي فرصتك لتاخد رخصة طيران حتى لو كانت ع طيارة شراعية. بيضل اسمك طيار بالنهاية.
٥. نادي الرياضات الجوية الملكي الاردني
يرأسها صاحب السمو الملكي الأمير حمزة بن الحسين اللي بيموت ع القفز بالمظلات. اكيد رح تقفز قفزة نوعية عن الروتين بالساعة اللي بترن عليهم فيه.
٦. كلايمبات عمان
كونه مش دايما رح يكون معك وقت تسوق ٣ ساعات عشان مغامرة بمعنى الكلمة، روح ع مبنى بعمّان ع طريق ناعور بتستمتع بالتسلق الداخلي و تعيش اللحظة حتى لو صغيرة.
٧. مركز الاستكشاف و المغامرة الاردني
ع طريق المطار هالمخيم معمول خصيصاً للمغامرات الفريدة المبتكرة. اجمل اجواء ضمن غابات و طبيعة و بالواقع، ما بعدت كثير عن بيتك.