٨ اشياء ما بيتقبلوها الاهل الاردنيين

على قد ما بنحب اهالينا، على قد ما بنتضايق من بعض تصرفات مش يإيدهم كونه جيلهم مختلف تماما عن جيلنا. و عشان هيك، في اشياء ما رح يفهموها بخصوص الجيل الحالي، مثل:

١) العربيزي:

لغة بتداولها الشباب و هي مزج بين العربي و الانجليزي باستخدام احرف و ارقام اللغة الانجليزية. الاهل مش مقتنعين انه الارقام احرف زي ما احنا ما كنا مقتنعين انه بعلم الalgebra، الاحرف ارقام…

٢) التكنولوجيا:

مستحيل يستوعبوا facetime، التابلت صعب يستخدموه، suri and google قصة اخرى و مواقع التواصل الاجتماعي فضيحة لكل ابن و ابنة. نفسي افهم شو بُخطر ع بَالهم لما يعملوا فيسبوك وغيره؟

٣) الدوام و الطلعة:

الرابط العجيب بين الدوام و الطلعة بس مفهومة عند الاهل. بترجع من الدوام و بترتاح و لمّا تيجي تطلع مع صحابك لازم يسمّعوك جملة ” ما انت كنت طالع من الصبح و تَوَّك رجعت” و هاتلَك اقنعهم انه الشغل لا تُعتبر طلعة و الطلعة مع الرفقة غير.

٤) مشغولين:

مصيبة اذا ما ردّيت من اول نص ثانية من الرنة! و يا ويلك اذا رنّوا مرتين و ثلاث و ما ردّيت. خُذلك اقنعهم انك كنت بالحمام، باجتماع، بأي اشي و انه جد مشغول.

٥) اللبس:

لازم تِسمَعلَك كلمة عالبنطلون الممزّع، كلمتين عالكيلون الfishnet و موَّشَح عالcrop top. ما رَح يقتنعوا انه هاد الاشي دارج الايام هاي و لازم نمشي عالموضة و الدنيا تغيّرت، الخ…

٦) الشبع و الجوع:

اكيد ايام روَّحت عالبيت شبعان مع انك ما بتكون ماكل شي من برّا. بس هيك، مش جاي ع بالك تاكل. و اكيد اهلك اتهموك انك اكلت من برّا و الاكل برّا مش صحي و لمين الطبيخ اللي بالبيت و غيراته. بس لمّا تكون مروَّح ميّت من الجوع و ما يكون حدا طابِخ، بيسمّعوك الف كلمة على كيف تجيب اكل ع البيت. طَب ما في طبيخ بالبيت، و ممنوع اجيب من بّرا، شو اعمل؟!

٧) الترتيب:

دايما بُضرب ع عَصَب الاهل و الامهات بالذّات (و مرّات الاخوات الكبار). في ناس ocd و لازم يرتبوا اماكنهم عشان يِقدروا يكملوا حياتهم و الاغلب بيضَل مبَربَش و بيطول الاشي اللي بده ياه بثانية تحت اكوام من البَربَشة بدون ما يرِفِلّه جِفِن.

٨) الدراسة او الشغل:

مرّات جد ما بيكون جاي ع بالك تدرس او تشتغل من البيت او المكتب و لما تحكي لاهلك انه بدّك تدرس او تشتغل برّا بكافيه او كوفي هاوس ما بيصدقوك، بيفكروك طالع تلتهي مع صحابك.