مطاعم ومقاهي
١٢ مطعم صحي و نباتي للي بيحب هاي الاشياء
صار موضوع الاكل الصحي و العضوي كثير شايع بالاردن و اللي بفهم فيه او ما بفهم فيه صار ياكل اكل عضوي. يعني المفهوم عندنا، اذا بدك تكون صحي، لازم اكلك يكون عضوي و يفضَّل نباتي. و هالمحلات بيفيدوك بحال مش عارِف تطبخ شي صحي او مش جاي ع بالك مثلا:
١) بريمروز – صويفية
هالمطعم عنده كل شي من سلطات، شوربات، سندويشات و اطباق بروتين لحد الحلويات و العصائر. كمان عندهم عروض لوجبة او اثنين او ثلاث على مدار اسبوعين او شهر. اللي لازم تجربه عندهم هو الCranberry Chicken Wrap.
٢) ذا نوتريبوكس – شارع مكة
ظنّك بالمحل ما بيخيب مع مهندسة التغذية، مجد الخطيب. فيك تشترك بالعروض تاعهم اللي همه ٦ وجبات او وجبة واحدة يوميا او تطلب من المنيو اليومية اللي فيها اكلات مختلفة و ازكاها ورق العنب اللي ب٣٦٥ سعر حراري Calorie واللي دايما بِخلَص من اول ما ينزل، فلحِّق حالك.
٣) او جيز – ام اذينة
مشهورين بسلطاتهم و اللي اهم من هيك الصلصات المتنوعة اللي ممكن تحطها عالسلطات. البيستو، دبس رمان منَعنَع، فستق تايلندي، سيزار مفَلفَل، البلسامي، الزنجبيل الملَمَّن و السماق الكريمي. حطهم ع اي سلطة و ما بتندم بس لازم تجرِّب سلطة التفاح الاخضر و الزنجبيل مع جاج مشوي.
٤) سيد – عبدون
عندهم عصائر و سموثيز عن وجبة بحالها. لازم تجرب سموثي التمر Dream Date Smoothie او العصير الاخضر المفيد، Dr. Green و كاسات الفواكة و الشوفان زي الPomegranate and Pistachio و الBeet and Oats.
٥) برايمال – عبدون
مطعم عضوي عالآخر و ازكى شي لما ينزلولك سلة الخبز تاعهم اللي مخبوز من المكسرات و الحبوب مع تغميسة زيت زيتون بلدي و خل بلسامي. جرِّب الرافيولي بصلصة الليمون و سلطة الكايل Kale و التين.
٦) لايتي لايتس– بس توصيل من مطبخهم بطريق المطار
الطباخة و مهندسة التغذية، نورا عبدالهادي بتطبخلك الذ الاكلات الصحية و بتوَصِلهُم عليك ع دوامك او البيت. و من اطيب طبايخها الدجاج الاسيوي بالرز و سلطة البندورة المنَشَفة.
٧) كيتشينيت – دابوق
بتلاقي عندهم منيو يومي بطبايخ مختلفة بالاضافة لمشاويهم، سلطاتهم، شورباتهم و الباستا و الحلويات اللي عندهم بسعرات حرارية قليلة. اذا حابب تِضحَك ع حالك بإشي دسم، اطلب صدر الدجاج مع الالفريدو صوص، منطقيا بتحِسُّه دِسِم بس هو خفيف لطيف عالمعدة.
٨) شمس البلد – وسط البلد
عضوي ١٠٠٪ و كل شي مزروع عندهم او بيجيبوه من مزارع معروفة. من اطيب الاماكن اللي تِفطَر فيهم بالذات مع اللبنة ع طابون، بشرط تحط كل شي عليه.
٩) ديتوكس مي – عبدون و خلف غرغور (طريق المطار)
عصائر كحولية من غير كحول. يعني، اذا إجا ع بالك تِشرب بس بدَّك تضلّك صامد عالدايت تاعك، روح عليهم. عندهم Mocktails بتشهّي من بينها Red Sangria و Appletini و اطيبهم الDaiquiri.
١٠) سالاد بوتيك – شارع مكة
كل يوم سلطات جديدة و نكهات غريبة ما بتتخيل انهم يزبطوا ع بعض بس زابطة. زي الفريكة اليونانية او سلطة الشاورما او حتى السبانخ بالفراولة.
١١) بيبير و باين – عبدون
معروفين بصحونهم سواء الفطورية او صحون الرز. جرِّب الشيبس الملَمَّن المفَلفَل Lemon Pepper Chips و صحن الاكاي Acai of Relief و حتى التوفو WTF (What to fu).
١٢) جوز هند – جبل اللويبده
محل عائلي جدا. كل يوم عندهم منيو مكون من طبق شوربة، باستا، نباتي و صحن رئيسي جديد. بتحسّهم قَلال، بس كل يوم رح تحتار شو تطلب و تاكل. خُذهم كلهم.