مطاعم ومقاهي
أزكى ٤ مطاعم تاكل فيها سوشي بعمان
سواء كنت بتحب السوشي أو ما عمرك جربته، في مطاعم كتير ممكن تجرب فيها السوشي بعمان، واخترنا الك أحسن أماكن ممكن تستمتع فيها بوجبة السوشي والأكلات الآسيوية إللي رح يحبها قلبك واللي رح ترجعلها أكيد مشان تاكلها مرة تانية!
The Sushi Den
كان ولساته واحد من مطاعم السوشي البارزة في عمان، خاصة إنه بقدم سلطات وأصناف نيجيري مميزة كتير، واللي بخلي هالمطعم مختلف عن غيره هو إنك بتقدر تطلب سوشي يجي لعندك بأي مكان، وعلى الرغم من إنه مطعم صغير بس عالأكيد رح تحب تقضي وقتك فيه لتستمتع بالوجبة الآسيوية اللي مشتهيها.
Fish Face
عاشقين السوشي بوريتو هاد هو مكانكم المفضل بعمان! Fish Face بقدملكم أشهى بوريتوز اللي بتوفرلكم مزيج من الخضار الطازجة وسلطات السمك الشهية، ورح تستمتعو بوجباتكم في أجواء المطعم اللطيفة والهادية، خاصة إنه موقعه قريب من حديقة الديار في عبدون.
Noodasia
المميز ب Noodasia هو إنهم بوفروا بوفيه مفتوح كل أسبوع اللي ممكن تاكل فيه قد ما بدك من أنواع السوشي المختلفة والساشيمي و النكهات الآسيوسة الشهية، كمان ممكن تختار من المنيو تاعهم اللي بيرضي كل الأذواق، لأنه أطباقهم بحضرها أمهر الطهاة المدربين على أصول الطهي .
Tom Yum
المنيو في Tom Yum بقدملك أنواع مختلفة من الأكل الآسيوي اللي يتضمن السوشي، والسبرينغ رولز، والجمبري، وكرات الدجاج، والنودلز، والشوربات، وغيرها. دايماً تذكر الأكل هون ما بيحلى دون مشاركة، مشان هيك لا تنسى تجيب أصحابك معك! مع إنه شوي غالي بس أكيد الأكل فيه بيستاهل، لأنه السوشي هون بدون أي شك من أطيب السوشي في عمان.