أشياء نحبها
أشياء تعملها في عمان خلال عطلة نهاية الأسبوع
مين منا ما بستنى عطلة نهاية الأسبوع مشان يرتاح من تعب الدوام والصحوة بكير والروتين الممل؟؟ كلنا بنستناها بفارغ الصبر مشان نعمل الأشياء اللي بنحبها مع أصحابنا ومع عيلتنا، بس المشكلة أحياناً كتير بنسأل حالنا أكتر من مرة شو نعمل أو وين نروح بس ما منعرف، مشان هيك هون رح يكون في اقتراحات لأشياء ممكن تعملوها بالعطلة.
إلعب مع أصحابك ولا تقعد بالبيت!
موجود أماكن كتير بتوفر ألعاب للكبار ممكن يلعبو فيها على شكل مجموعات زي مثلاً في Escape the Room وهي لعبة مشوقة، بتم فيها تقسيم اللاعبين لمجموعات، ولازم خلال هاللعبة يفكوا الرموز والشفرات ويلاقو طريقة ليهربو بأقل من ٦٠ دقيقة، ممكن تحجز لهاللعبة عن طريق الإنترنت، وفي إلهم أكتر من فرع، فممكن تروح عندهم في عبدون أو الصويفية.
زيارة الأماكن الأثرية
في عدد مالن الأماكن الأثرية اللي ممكن نزورها في عمان ونستمتع بوقتنا، ومن هاي الأماكن جبل القلعة والمدرج الروماني في وسط البلد، والحلو أنه هدول المكانين موجودين في منطقة حيوية، يعني في حوليها كتير مطاعم وكافيهات وممكن الوصول هناك بالمواصلات العامة لو ما معك سيارة!
إلعب بسكليت مع المجموعات المخصصة
صحيح إنه شوارع عمان مش مناسبة للعب البسكليت، بس في كتير مجموعات متخصصة بترتب رحلات أسبوعية لمحبين رياضة لعب الدراجات الهوائية، وممكن تلاقيها على الفيسبوك أو الانستغرام، ومنهم: Bike Rush، و نادر Bike، وCycling Jordan، وغيرهم كتير.
مشاهدة فيلم في السينما
أغلب صالات السينما في عمان موجودة داخل المولات في أماكن مختلفة وسهل أي حدا يوصلها، زي سيتي مول وتاج مول والعبدلي وغيرها من الأماكن، وجود السينما داخل المول مفيد من ناحية أنه ممكن تحضر الفيلم بعدين تتسوق أو تقعد بشي كافيه لطيف مع أصحابك.