أشياء تعملها قريب من الجامعة الأردنية

إذا إنت ساكن قريب من الجامعة الأردنية أو بتدرس فيها أكيد بهمك تعرف وين ممكن تروح أو ايش في أشياء ممكن تعملها قريب من هالمنطقة، وفي هاد المقال رح نركز على أهم الأشياء اللي ممكن تساويها في هاي المنطقة من عمان.

تعلّم لغة جديدة

في شارع الجامعة الأردنية في عدد منيح من المعاهد اللي بتوفر دورات مميزة للغات زي الإسباني والإنجليزي والفرنسي والألماني وغيرها، فحاول استفيد من وجودك قريب منها وسجّل بدورة لغة مشان تستفيد من وقتك وتقوي مهاراتك وتتعرف على أصحاب جداد.

زور المدينة الرياضية

المدينة الرياضية موجودة قريب من دوار المدينة، وهي أرض واسعة كتير مناسبة لممارسة رياضة المشي والجري وحتى ركوب البسكليت، والأحلى من هيك إنه ممكن تحصل على تدريب لأنواع متعددة من الرياضات زي كرة السلة أو التنس الأرضي أو كرة القدم وغيرها، والمدينة الرياضية مناسبة جداً للعائلات لأنه الأطفال أكيد رح يحبوها، مشان في أماكن كتير للعب مناسبة إلهم.

زور المطاعم والكافيهات في المنطقة

في عدد منيح من المطاعم والكافيهات ممكن تروح عليها بشارع الجامعة الأردنية أو قريب منه، ومن هالمطاعم شعبية زي مطعم حضرموت وباب اليمن ومطاعم بيت المقدس، ومنها كافيهات بتقدم أنواع تانية من الأكل والقهوة زي indoor café و cake shop و October Blue Café وغيرها، بعض من هاي الكافيهات بتقدم الأراجيل لو كنت بتفضلها.

ما تنسى،، المواصلات بشارع الجامعة بتوصلك لكل مكان!

الحلو بوجودك بشارع الجامعة إنه معظم الباصات بتمر منه يعني إذا بدك تروح على أي مكان بعمان ممكن تلاقيله باص من هناك، إنت بس إسأل أي حدا عند نفق الجامعة وهو رح يدلك أي باص تاخد!