مطاعم ومقاهي
١٠ مطاعم لآخر الشهر
كلنا بنمرق بفترة بآخر الشهر يللي بنحس فيها بالقطعة. فترة بتكون الجيبة تعبانة و بنقتصد لينزل راتب الشهر. بس بذات الوقت بنحب اندلع حالنا و هون رح نساعدك باختيار كم محل للاوقات المخنوقة هاي:
١. K and K Restaurant – شارع مكة
اذا بتحب الكرش و الفوارغ، هاد المحل المناسب اللي تروح عليه. عليهم فتة راس بتشهي ب٥ دنانير و نص.
٢. مطعم غيث – خلدا
هاد المكان اللي بيفيد كل حدا عايش بعيد عن اهله و مشتهي اكل البيت. من الدينار و نص و اطلع، بتلاقي عنده ورق دوالي للايام اللي مش عبالك تلف.
٣. جميدة خانم – جبل عمّان
منسف. ب ٧ دنانير.
٤. مطعم السروات – شارع وصفي التل
شاورما، مشاوي، مزّات بتراب المصاري. النص جاجة عندهم ب ٣ دنانير.
٥. مطعم القدس – شارع الرينبو
فلافل عالعَهد القديم. محل قديم بس لذة الطعم عنده دايما جديد. ساندويشات فلافل بتبلش ب ٤٠ قرش.
٦. مطعم الخال – جبل اللويبدة
بلّش يومك بفطور مرتب مع صحابك و حبايبك. قلّايات، كبده، مفرّكة بطاطا، حمص، فلافل، فول، بيض، مزّات و شاي من الآخر. قسّم الحساب ع بعضكم و بتكون دافعلك ليرتين بالكثير عالطلعة.
٧. المبرور و قدورة – شارع المدينة المنورة
اكيد والدتك دايما بتوصيك تاكل سمك و تزيد نسبة اليود بجسمك و كونه معروف انه احنا مش بلد بحري، بنحس انه السمك غالي شوي. جرب سمكة الدينيز المشوي ب٨ دنانير.
٨. دا عصمت – شارع الرينبو
اكل ايطالي رخيص و زاكي. سباغيتي ب ٥ دنانير بتاكل اصابيعك وراها و اذا بدك تزوّد، اطلب بيتزا.
٩. ذا سوشي دن
ما في محل، بس بوصلولك وين ما كنت. حتى للسوشي خَيَار رخيص. ١٢ حبة ماكي ب١٠ ليرات و نص.
١٠. حلويات حبيبة – افرع بكل البلد
التحلاية ببلاش. نص كيلو كنافة ب ٣ دنانير إلا ٢٠ قرش. يعني ليرتين و ثمانين.