أشياء نحبها
اشياء ممكن تعملها بالاردن بأقل من دينار
كلنا صرنا نحكي انه الدينار، الدينارين و حتى الخمسة ما بيعملوا اشي.. بس جد بوقت الطَفَر ممكن نلاقي و نسَوّي كتير شغلات حلوة و بِتسَلّي و بأقل من دينار. هي احلى ٦ اشياء ممكن تسويها:
١. زيارة جبل القلعة
جبل القلعة من احلى و افخم الاماكن الاثرية عنا بعمان. الدخولية عندهم ٢٥ قرش . كتير المناظر حلوة من هناك، بتقدر تشوف وسط البلد كُلُّه مع المُدَرَّج الروماني.. هاد غير عن معبد هرقل ، القصر الاموي وبقايا من كنيسة بيزنطية.
٢. اشرب قهوة من ابو صالح و روح عمطل من مَطلّات الفحيص الحلوة
كتير مرّات منكون ضايجين و حابّبن نرَيِّح عيوننا بمناظر حلوة و طبيعية. بالفحيص في كتير اماكن بتقدر تستمتع بجمال الطبيعة فيها اكيد، مع كاسة قهوة من عند ابو صالح.
٣. بتقدر تروح تلعب عال bicycle بحدائق الحسين
كتير منا بيحب يمارس هاي الرياضة باماكن حلوة و آمنة، منقدر نلعب بلا ما نعتل همّ السيارات جنبنا.
٤. تمشّى بشوارع الويبدة وقت ال sunset مع قطعة كلير من عند حلويات فيروز
تعتبر الويبدة من اكتر الاماكن الحلوة عنّا بعمان و يعتبر محل فيروز من اعرق و اقدم محلّات الحلويات عنا بعّمان. قطعة الكلير عنده ب ٧٥ قرش.
٥. روح تمَشّى بالبوليفارد
من اكتر المحَلّات الحلوة و الجديدة عنا بعمّان – العبدلي. كتير عم يصير فيها محَلّات ، كتير مَرّات منحب نروح نتمشّى فيها نحن و منشرب iced tea من عند محمص الحموي. المحل بيعمل events مختلفة بالفصول مع دخولية بسيطة وقت المناسبات.
٦. زيارة المدرج الروماني بوسط البلد
كتير منحب نزور الآثار اللي ببلدنا ، خصوصا اللي قريبة منا و بوسط البلد. الدخولية بربع دينار هناك ، والمنطقة جد عريقة وحلوة.