قوائم
تمارا دباس

اشهر ٣ هدايا للخريج بالاردن

فرحة تخرج طالب التوجيهي او الجامعة وبانه انتقل من مرحلة الدراسة لمرحلة الحياة العملية والشغل (للأسف مو عارف انه رح تبلش الخوازيق!) فرحة كبيرة، ومو بس هو حتى اهله للخريج بكونوا مو مصدقين انه ابنهم كبر ورح يبلش يعتمد على حاله و يمكن بعد سنة يتزوج، ولهيك من اهم طقوس الشعب الأردني بيوم التخرج انهم يحتفلوا بالبيت بعد التخرج مباشرةً. بيوصل الخريج لابس روب التخرج عالبيت وبلاقي كل الاصحاب والاقارب والجيران بستنوه ومعهم احلى الهدايا :


١) نقوط




مبلغ مالي بتراوح بين (٥ دنانير – ٢٠ دينار) بيعطوه للخريج لما يسلموا عليه باليد او ممكن يكون بداخل مغلف ابيض ومكتوب عليه اسم الشخص اللي نقّطه، ولازم الخريج يحاول يرفض المبلغ (نوع من الخجل مع انه بكون طاير من الفرحة) ولكن تحت الضغط بياخده مع الشكر.



٢) كنافة او شوكولاتة الفرسان




من فرحة الجار او العم او الصاحب، اول ما يسمع انك تخرجت بروح على احسن محل كنافة وبجيب سدر ٥ كيلو عالاقل وبيدخل عليكم فيه كتعبير عن سعادته وكنوع من المشاركة و اذا كان معه وقت، بمرق عالفرسان و بيجيب شوكولاتة مُعتَبَرة بفازا ليستفيدوا منها كزينة للبيت.



٣) طقم كاسات




مبدئياً انا كخريج شو بدي بطقم الكاسات؟ يمكن لو عريس او عروس اتقبل الهدية واستخدمها ببيتي، بس هي وحدة من الثنتين يا إما المقصود من هالهدية هي لأم الخريج او اللي جابها إجَتُه هدية وعمللها إعادة تدوير! وعالحالتين الخريج مش مستفيد.


و بهالمناسبة، اشهر أغاني حفلة التخرج:

وحياة قلبي وافراحه:



نجحنا



مبروك مبروك الفين مبروك



و اغاني عمر العبداللات