أشياء نحبها
قواوير عمان.. شو مزروع فيهم؟
لما تكزدر بشوارع عمان، رح تنتبه انه البلكونات ومداخل البيوت مزينة بقواوير زريعة بتضفي لمسة جمالية مريحة للعين والقلب، بس شو أكتر زريعة موجودة في قواويرنا؟
السجاد
طبعا إله اسم تاني وهو الكوليس، بتكبر بسرعة وأنسب وقت لزرعها في الربيع والصيف، ألوان أوراقها بتتراوح بين لون أو لونين أو أكثر، الألوان الزاهية بتشعرك انك قدام سجادة زاهية.
النعنع
“جابنا بحوض نعنع” من الجمل المتداولة في عمان، وهاد دليل انه هالنبتة منتشرة في بيوتنا، بنستخدمها في السلطة وما أطيبها في كاسة الشاي بعد العصر أو تنشرب على شكل منقوع لتروق الأعصاب. بتتميز بأوراقها الخضرة وريحتها اللطيفة.
الريحان
افرك أوراقه لتفوح منه ريحة عطرية لاذعة بس رائعة، معروف باستخداماته في الطب الشعبي وكمان ممكن ينضاف على بعض الأطباق المميزة وخاصة السلطة. ألوان الأوراق بتتراوح بين درجات الأخضر والبنفسجي حسب النوع، ومن أسماؤه الحبق ومتل ما غنت فيروز “يا حبق ومنتور على سطحي العالي”.
تم السمكة
معروفة بأسماء كتيرة منها حنك السبع أو أنف الثور أو أنف العجل، وبس تضغط على زهرتها بتحس انها عنجد تم سمكة. ألوانها زاهية مفرحة للنفس منها الأحمر، البنفسجي، الأبيض، السومو، الأصفر، البرتقالي.
مخلب القط
أو ظفر القط، من النباتات المتسلقة “المدّادة”، معظم أيام السنة بتحافظ على خضرتها، لكن بتتساقط أوراقها في فترة الشتا، معظم بيوت عمان القديمة زارعينها لتغطي حيطان البلكونات وتعطي منظر مبهج.