٧ جيران بتلتقي فيهم بكل حارة

سواء ساكنين بشقة في عمارة او بيت مستقل بحارة، اكيد التقيت بواحد او اكثر من هالجيران و ممكن تكون واحد منهم كمان:

١) الخِتيارِيّة: هالزوج و زوجة جوَّزوا كل اولادهم و قاعدين بالبيت لحّالهم الا بحال ما ييجوا يزوروهم اولادهم و احفادهم و يعبّوا الدنيا لِعِب و صراخ مع انهم بنزعجوا من الصوت العالي لكن احفادهم غير. بالعادة بيناموا بكّير كثير و دايما بِدعولك لمّا تساعدهم بِحَمل اغراضهم للبيت.

٢) المغتربين: هاي العيلة عايشين بالخليج و برجعوا كل صيفية مع قرايب رايحة و جاية تستقبلهم، تزورهم و تودِّعهم. يعني صيف مليء بالدوّشة المتواصلة.

٣) البخيلين: هذول معهم يركبوا سيارات فخمة و يشتروا اثاث مرتب بس ما معهم يدفعوا خدمات العمارة او للحارس المسكين اللي بيعَتِّل اغراضهم.

٤) المتقاعدين: هذول قاعدين بالحارة عالنَقرة. بيصبِّحوا بفنجان قهوة عالبَلكونة و عالشُباك و بيراقبوا الكل و بيعرفوا التفاصيل الصغيرة اللي بتحصل. مش شرط المتقاعدين، ممكن تكون ربّة منزل قاعدة لحالها بالبيت طول النهار.

٥) العرسان: هذول شخصين تزوجوا جديد و عايشين حياتهم. قليل ما بتلاقيهم بالبيت لانهم بنعزموا من حدا لحدا. بتُصدف فيهم الصبح او بالليل.

٦) الموجودين بس مش موجودين: جيرانك بس ما بتصادفهم بالمرة. مش اجتماعيين و اذا التقيت بواحد منهم، ما بيعبرك حتى. يفضل تتفاداهم قدر المستطاع لانهم رح يتفادوك اساسا.

٧) الطلاب: إما شخص او اكثر مستأجرين او مالكين عايشين بهدف الدراسة بالأردن. ممكن يكونوا اردنيين و اهلهم متغربين او من جنسيات اخرى. بالاوقات اللي ما بدرسوا فيها، يا بتسمعهم عاملين حفلة بنص الليل او ضجتهم لمّا يرجعوا من حفلة.