قوائم
شامان العبداللات
This article is also available in English. Switch Language

١٣ مثال اردني شعبي لسا يستخدموا في يومنا هذا

احلى اشي تعلمناه من الختيارية هو الامثال اللي تستخدم بمواقف معينة بحياتنا اليومية. مرات بنقدر نختصر المفهوم بكلمة، بس حلو تروح تِسردلك المثال كله و تتفلسف عالموجودين. هالامثال و معانيها، اكيد سامعها من قبل و سامع اكثر منهم كمان:

١) الغرقان ما بيهمه البلل : بتحكيها للي بتورط بمشكلة و و ما بيعود يهتم للاشياء الثانية

٢) غَز رايته و مَحا سيته : بتحكيها للي محا سيئاته و صار صالح

٣) عمر القصير ما يوكل تين : بتحكيها لما الموضوع يكون تحصيل حاصل و ما رح يتغير

٤) العمر محدود و الرب معبود : بتحكيها لما يكون في واقع، لا مفر منه

٥) من رادك ريده و من طلب بُعدك جافيه : بتحكيها لما يكون المقصود انك تُعامِل الشخص بالمِثل

٦) من يمشي على رجليه، شهود ما عليه : بتحكيها لما تشك بالشخص، لانه اللي بمشي على رجليه بيقدر يبعد عنك و يعمل اللي بده ياه بدون ما يحكيلك

٧) مش كل من صَف صواني، حَلَواني : بتحكيها لواحد اعطيته شغل تافه و ما عرف يخلصه

٨) اللي ما بيعرف الصقر يشويه : بتحكيها للي بشتغل شغله ما بفهم فيها

٩) جاجة حفرت على راسها عفرت : زيها زي اللي حفر حفرة و وقع فيها

١٠) اللي يدُق الباب بيلاقي الجواب : هاي بتحكيها للشخص اللي بشكيك من واحد ظلمه

١١) من برا رخام و من جوا سخام : بتحكيها للشخص او الشيء الجميل من برا و سيء من جوّا

١٢) اللي بدري بدري و اللي ما بدري يقول كف عدس : زيها زي خليها بالقلب تجرح و لا تطلع برا و تفضح

١٣) جنّت على نفسها براقش : بتحكيها للانثى اللي قَضَت على حالها من حالها

و اخيرا، ما ضل اشي ببلاش غير العمى و الطراش

هاي مهمة بوقتنا الحالي اللي بتركز عالغلاء المعيشي