كيف توفّر مصاري وأنت بعمان

كلنا بنعرف قديش الأسعار بعمان غالية، وأحياناً كتير بكون من الصعب يمر الشهر من دون إحساس إننا مفلسين! مشان هيك إحنا لازم نعرف كيف ومتى ومن وين نشتري أغراضنا! وهون رح أورجيكم أكم نصيحة ممكن تساعدكم.

تعاون مع غيرك في المواصلات

لو عندك سيارة وبدل متدفع مصروف بنزينك للشغل كل يوم لحالك، ممكن تشوف حدا ساكن قريب منك بحتاج توصيلة بطريقك، وتقسموا سعر البنزين بيناتكم، صحيح الموضوع بده التزام بس مع شوية تنظيم ومع التعويد رح تصير الأمور أسهل.

شارك بجمعية

طول مالمصاري بإيدك رح تصرفها، مشان هيك حاول تلاقي جمعية وشارك فيها هيك رح توفر ورح يجيك مبلغ كبير لما يييجي دورك، الموضوع بيستاهل.

اعرف من وين تجيب أواعي

اكتر اشي بنصرف عليه في عمان هو الاواعي والاكل؛ بس لو كنت ذكي ممكن عادي تلاقي بعض أماكن الأسعار فيها مناسبة، بس بدها شوي تعب زي سوق الجمعة صحيح مستعمل بس ممكن تلاقي فيه ماركات ممتازة وبأسعار يا بلاش! وكمان بنصحك تروح سوق التصفية، والمولات لا تدخلها الا أوقات التنزيلات!

اعتمد على أكل البيت

انك تشتري كل يوم اكلك من المطاعم ممكن يكون مكلف، مشان هيك حاول دايما تخلي معك علبة تحط فيها اكل من البيت وهاد الشي رح يخليك توفر بحدود ال ١٠٠ دينار بالشهر!