قوائم
كاتب
This article is also available in English. Switch Language

١٠ اغاني بتسمعهم بكل عرس اردني

احلى ما في الصيف، الاعراس. واحلى ما في الاعراس، اغانيها – و كمان اللبس و التعليق عالناس اللي بترقص، بس مش موضوعنا – نرجع عالاغاني، طبعا اكيد بتسمعلك تشكيلة متنوعة، منها القديم و منها الجديد. لكن في اغاني لا بد منها بكل عرس أردني و اهمها:


١) زفتنا ١ و زفتنا ٢ للفنان عمر العبداللات



مَدلي من الاغاني اللي كانو يغنوها الختيارية زمان عالعريس و العروس بتحمسك بشكل مش طبيعي.



٢) اغاني المحافظات للفنان عمر العبداللات



هالمغني غنّاله اغنية ع كل محافظة أردنية، و بناءً على اصل العريس و العروس بتِنحَط اغنية تبجيداً بأصله.



٣) علّي الكوفية للفنان محمد عساف او الدحيّة للفنان عمر العبداللات:


هاي محمسة للأصولهم فلسطينية بالذات و للي بيحب الدبكة بشكل عام و مرادفها الدحيّة الأردنية اللي بيوقّع حلبة الرقص بالصَحجِه (الزقفة القوية) المحببة للرجال من كل الاعمار.



٤) مَدلي لبناني للفنان سامر كبرو او الفنان هشام الحاج:



يتضمن سلسلة اغاني مشجعة مثل “قومي تنرقص”، “جني جني”، “يا بنت السلطان” و “طلعت الحلوة و شعرها طاير على خدا”.


٥) رُدي شعراتك



هاي اغنية جديدة نوعا ما بس موجودة بكل حفلة من ال٢٠١٧ لليوم. في ناس بتحب الاصل من الفنان عيسى الصقار او الاصدارات الثانية من الفنانين هيثم الشرمان او الفنان طوني القطان.



٦) لَعبُر على تركيا او اي اغنية دبكة اخرى:



اهم شي يكون في دبكة بالحفلة، مِجوِز، تشوبي، لبناني، ما بفرق! المهم دبكة.



٧) بيطلعله او ميليلو للفنان حسين السلمان:



كمان اغاني محمسة بيتغنّا فيها للعريس و العروس.



٨) جيناك بهاية للفنانين نور الزين و غزوان الفهد او اي اغنية عراقية اخرى:



لا تسألني ليش بس لازم يكون في اغنية عراقية بالحفلة.



٩) شلون انساك لفرقة ميامي او اي اغنية خليجية اخرى:



كمان بعرفش ليش بس لا بد من الخليجي



١٠) اغاني اردنية عن الجيش و الاجهزة الامنية


: هاي اغاني تُغنّا للجيش او سلاح الجو او الامن العام او الدفاع المدني او الدرك للفنانين متعب الصقار، بشار السرحان، فرقة اللوزيين او عمر العبداللات و حسين السلمان حسب وين بشتغلوا العريس او العروس. و بحالة ما حدا من العرسان بشتغلوا فيهم، بتِنحَط لحدا من اهلهم او اصحابهم او حتى لعيون سيدنا.


و ما ننسى اغنية “هواكي يا اردن” للفنان احمد العلي اللي هي على لحن بشرة خير للفنان حسين الجسمي فِدَا وطننا الحبيب، الاردن.