قوائم
كاتب رئيسي
This article is also available in English. Switch Language

انواع المتأخرين عن الشغل بالاردن

كل يوم الصبح كلنا بنفكر بحجة او عذر لحتى ما نطلع على دوامنا. واذا عجزنا وما لقينا حجة او تقرير طبي بنصير ندور على سبب لتأخرنا لحتى نقدر ننام ساعة زيادة. وهدول همه انواع المتأخرين عن الشغل وحججهم:

١) الشاكي

هاد الشخص دايما بحطّ الحق على حظه وانه هو ما بتأخر بس كانت الطريق ازمة، او ضيّع مفتاح السيارة، او السيارة تعطّلت، او المصعد علّق وهو جواه…

٢) اللامبالي

متأخر ومو فارقة معه. ولو اعطيته تنبيه بسبب تأخره ما بتفرق معه وما بحاول يبرر تأخيره اصلاً، ”انه عادي تأخرت، شو صار؟؟؟” ”اصلا انا دافع للشركة، قاعد هون بمصاريي“.

٣) المعطاء

هاد بستخدم اسلوب ”طعمي التم بتستحي العين“. بوصل متأخر وبجيب معه فطور للكل وهيك ما حدا بسأله ليه متأخر؟

٤) الحساس

هاد اللي بتأثر باي ظرف بصير بالعيلة او عند الجيران، يعني ممكن يتأخر لانه جد جارهم اتوفى وهو زعلان عليه، او عشان البسّة اللي بالشارع اندعست…

٥) النذل

هاد بييجي متأخر واذا سألته عن سبب تأخره، ما بجاوب و بذكرك بكل مرة تأخرت فيها وبعايرك فيهم!

٦) المحتال

اللي بيتأخر وبحسسك انه انت مداوم بكير كتيييييير، وبحاول يضيع الموضوع.

…وما بننسى انه بكل شركة في الموظف المثالي اللي بعمره ما تأخر ودايماً بيوصل عالموعد اذا مو قبل، ودايماً جالط الكل لانه نموذج بيعايره فيه المدير كل الموظفين لما يتأخروا، ”شوفوا فلان عمره ما تأخر على دوامه، كونوا مثله“