قوائم
العيلة المنسفية! إنت أي واحد منهم؟
بكل عيلة أردنية في أشخاص يُعتبروا من قواعد العيلة الأردنية! وثابتين متل أساسات الدار، وإذا ما التقيت بواحد منهم على الأقل لازم تتأكد من هوية العيلة المنسفية! يا ترى مين هم؟
المغترب:
عايش طول السنة بستنى بالإجازة ويعتبر المصدر المالي الأول للعيلة.. بالمقابل أهله بضلوا يأجلوا كل إشي لحد ما ييجي! وبس ييجي ما بلحقوا عزايم ومناسبات وبرجع على غربته بنفس الأمل والنوايا!
الهيبة:
بوهم اللي حوليه إنه بعرف كل إشي من خلال وضعية المراقبة الصامتة، والأم بتستخدمه عشان تهدد الكل فيه! واجهة البيت وشايل حمل كبير.
أحسن واحد بالعيلة:
بلبي طلبات العيلة وبلشان بالكل! الصغار بتمون عليه قبل الكبار، وبتحمل مزحهم معه، لمّا يضيع بتلاقيه بأقرب دكانة عالبيت ولازم يطلع منها بكيس بوظة أم الـ ١٠ قروش.
الطافي:
بتعرّف عالعيلة بالمناسبات.. نومه تقيل ودايماً متأخر على دوامه، بتشوفه بحالتين يا نايم أو طالع من البيت! بالنسبة لأهله ولقرايبه (مرفوع عنه القلم) بس بالنسبة لأصحابه مصدر الفزعة والضحكة.
المشكلجي:
مش ضروري يكون صاحب مشاكل عشان ينشهر بين عيلته وحارته إنه مشكلجي! بس بتميز بمواصفات معينة وهي إنه دايماً بتبرع بدمه، صوته عالي، بمثل إنه ما بحب البنات، مصاحب كل زعران المنطقة من باب مكافاة الشر!
الحنونة:
هي الأخت اللي بتحاول تكمل دور أمها وتحتوي كل إخوانها وخواتها، بيتها مفتوح ٢٤ ساعة واللي بشتهي طبخة صعبة بطلبها منها وبس تقعد منها بتسكتش وهي تتشكون وتحكي شو بتعمل!
أكيد في أسماء كتير صارت ببالك! بس إنت مين من العيلة المنسفية؟