٧ انواع اردنيين وقت الاكل

يعتبر الاكل بالاردن وسيلة الترفيه الوحيدة واللي بتناسب أي مكان او زمان، وما بيحلى الأكل إلا مع الاصحاب، وهيّ قائمة بانواع الاصحاب وقت الأكل.

١. عامل دايت:

لازم بكل شلة يكون في واحد دايماً عامل دايت وشو ما حاولت تشجعه عالاكل برفض، بس اول ما يبلِّش اكل لازم ياكل معك اذا ما طلب سلطة.

٢. ما بياكل:

هاد بكون اكثر واحد متحمس عالاكل وبتشهون، ولما يبلش اكل بشبع من لقمة وبترك الأكل. وهون انت فرصتك انه تكمّل اكله اذا ما شبعت من اكلك.

٣. بياكل الاخضر واليابس:

هاد النوع بياكل أي شي بنحط قدامه، شو ما كانت الكمية بتحسه ما بيشبع. ما عنده نوع مفضل بالاكل، بحبه بكل انواعه واشكاله.

٤. ابو جابر:

من اسمه مبيِّن نوعه، بيُجبُر أي بقايا اكل بحجِّة انه “حرام نكبّه، نعمة ربنا وفي ناس مش ملاقية تاكل“!

٥. المفلسف:

– اللي لازم ينتقد الاكل لو شو ما كان نوعه. يعني مثلا ”لو كمية الخردل اكثر او الجاج مشوي بالطريقة المكسيكية او الخبز مخبوز بالطريقة الفرعونية بكون الاكل ازكى“. المهم يحكي!

٦. شحاد:

اللي عمره ما كان معه اكل بس دايما بياكل اكثر واحد وبيجرب كل الانواع الموجودة. اول ما يشوف حدا بسخّن اكل بالمطبخ بيدخل وبسأله عن الاكل وبيعطيه رأيه بالطبخة وفجأة بيصير ياكل معه كمان!

٧. النيئة:

هاد بيغلِّب… ما بياكل اي اشي و لا من اي محل و معدته بتتحسس و عنده ٦٠٠ حساسية و عامل حاله قرّيف و قصة. بيخرّب الطلعة قبل ما تبلِّش.