قوائم
تمارا دباس
This article is also available in English. Switch Language

٨ من اغبى أفكار كنا نصدقها واحنا صغار

يتضمن ذكريات طفولتنا كذبات بيضة كانو يحكولنا ياها و احنا صغار كنوع من الضبط او التخويف. وهدول اكتر ٨ أفكار كنا نصدقها واحنا صغار والغريب انها لهلا مستخدمة:

١) القهوة بتطلّع شوارب

كانت القهوة التركية الها أجواء رهيبة بيحسسنا بالكَبَر، بس كنا نخاف نشربها لانه أمهاتنا – الله يخليلنا اياهم – كانو يقنعوننا انها بتطلّع شوارب والمشكلة انه تَعَقَدنا منها و ما بتعود تفكر تشرب قهوة و بتحوِّل عالشاي.

٢) العصفورة حكتلي

مين منا ما مَرقَت عليه العصفورة بطفولته؟ العصفورة كان الها دور كبير باتباعنا الالتزام و الادب لانه موجود او مو موجود، كلنا خفنا من هالعصفورة اللي رح تِفسد كل شي و تخلينا نتعاقب.

٣) لاقيناك ع باب الجامع

ربنا الله، الاهل ما بحكوها، بس اكيد سمعتها من اخوك الكبير او حكيتها لاختك الصغيرة.هي الجملة كفيلة بأنه الشخص يقعد بالساعات يعيط مع انها مبينة كذب، عيني عينك. المصيبة لما مخك بسرعة يشتغل و تتخيل سيناريو عن ”اهلك“ الحقيقيين!

٤) بجيبلك الشرطة

المفروض انه الشرطة بخدمة الشعب و مش موجودين ليخوِّفوا اولاد الشعب! عبارة عن اسلوب ترهيب عشان ما تتهور او تغامر و اهم شي، ما تعمل مشاكل.

٥) لحسها الشيطان

ما تكَبكِب اكلك عالارض عشان ما يلحسها الشيطان و تبطِّل صالحة للاكل. لانه ما في طفل بيحب ياكل من ورا الشيطان، و لا لا؟

٦) ما رح تنمو

ما رح تكبر اذا ما كملت اكلك! انه ولا سنتمتر حتى؟ بالمرة بالمرة؟؟ هاي ضلينا نسمعها لدخلنا الاعدادية عشان تتعلم ما تترك اكل ع صحنك او بالشنتة، لازم تتغذا و تكمله كله.

٧) عدِّل الحذاء

يا ويلك تترك البوت او الشبشب مقلوب. حراااااااام. ما بيصير!

٨) الاختطاف

لانه دايما في حرامية، دايما في باص مليان مختطفين، دايما في احتمال تختفي و ما تعود تشوف اهلك بحال ما مشيت و لزقت فيهم.