اكتر الكلمات اللي بتبسط الاردني

كل الكلمات الحلوة و المُشجٍّعة بتبسطنا و بتعطينا طاقة ايجابية و حلوة بس في كلمات ًمعيَّنة و محدودة ممكن تشجِّعنا و تعطينا طاقة ايجابيّة اكبر بكتير، هي ٧ منهم.

١-لا تطبخي عازمك انت و الاولاد عالغدا

مين من أمَّهاتنا ما بتِعتل هم الطبخ من قبل بيوم و بتضلها تسأل كل واحد ايش بده يتغدّا كأنه في منيو خاص لكل واحد من العيلة. كلمة عازمك عالغدا من زوجها بتكون ثمينة كتير بالنسبة الهاً لانه ببساطة خلصت من طبخة اليوم و المنيو اليومي تبع كل فرد من افراد عيليتها.

٢- بكرا عطلة

طبعاً احلى اشي لما الحكومة تقرّ عطلة بيوم من ايّام الاسبوع، لو ربحانين اليا نصيب مش هيك ، بتلاقي هاليوم كسر الاسبوع و بطَّلنا نحس فيه.

٣- اسعارالبنزين رح تنزل

اكتر الاخبار اللي ممكن تبسط الشعب الاردني و بتلاقي الكازِيّات مفَلِّلة خايفين انه ترتفع الاسعار اليوم اللي بعده.

٤- نزل الراتب

بعتقد انه هاي احلى كلمة النا كلنا ، بتبسطنا لفترة محدودة لانه ما بلحق ينزل الراتب الّا و هوِّ طاير سداد ديون.

٥- في SALE

ممكن نتخيَّل شكل البنات والشباب لمّا يوصلهم مسج بحكي انه في sale ، وبتروح دغري لانه اهم اشي ما يروح ال sale عليها لانه باغلب الاوقات بتلاقوهم مخبيين القطع الحلوة اللي نفسهم فيها لل sale اللي بحلموا فيه.

٦- اربحت معنا جائزة

‘ايش ما اربح ما عندي مشكلة’ كلمة شخص نفسه يربح لو حتّى طقم فناجين قهوة .

٧- بكرا غدانا منسف

مين مِنا ما بموت عالمنسف، و بستمتع بأكله، صراحة كلنا مننبسط لما نعرف انه غدانا منسف.