قوائم
شامان العبداللات
This article is also available in English. Switch Language

١٢ شكل بتلاقيهم عالسوشال ميديا الاردني

لا بد من الاعتراف انه الانترنت صار جزء اساسي من حياتنا اليومية. بالذات مواقع التواصل الاجتماعي (السوشال ميديا). فيسبوك، انستاغرام، تويتر و سنابشات اخذوا كل عقلنا و تفكيرنا. و هون رح نعِدّلك كم شخص اكيد لقيتهم او رح تلاقيهم عندك:

١. الفاشنيستا

مستحيل ما مَرَق عليكم واحدة بتنزّل كل يوم لِبستها او لِبسة غيرها. بتعلّق عالماركات و بتنزِّل احدث الموديلات ع اساس انها عارضة ازياء او انها وجه لماركا عالمية. هاد الشكل بنصحك شو تستعمل و شو تلبس و كيف تحسِّن من مظهرك و المصيبة اذا كانت بتفهم بالمكياج. بتمضيها قاعد معاها للصبح.

٢. اللايف كوتش

هاد الشكل قرأله كتابين و بفتح يوميا عصفحة اقوال مشاهير و كل يوم بتفلسفلك بفلسفة جديدة. حرام، همّه موجودين ليعلموك الطرق و الاساليب لتعيش حياة سعيدة و مريحة ع اساس انهم ختموا العلم بخبراتهم الواسعة اللي ما بتجاوز كم سنة لعمرهم الصغير.

٣. المعلِّق الرياضي

مباريات فيصلي و وحدات، مباريات الكلاسيكو، كأس العالم، كأس ما بعرف شو…. كله عند هالشب الحِشِم. فيش داعي تفتح ع اي موقع رياضي طول ما عندك هاد الشخص. بيلخصلك كل المباريات مع تعليقات عالمشجعين و الحكم كمان.

٤. الراصد الجوي

العاصفة تقترب. بيهيأك للثلجة اللي نفسك يجي عشان تعطّل عن الدوام. بيخليك تطلع تشتري كل اغراض البيت و بالنهاية، نِتفِة شتا بنزل و يا دوب.

٥. السياسي

ربنا الله هالشخص مطّلع ع اخبار الاردن. بقرأ صفحات عمون، وكالة رم، خبرني و بيجي بيرتب افكاره بأسلوب بتحِسّه ما فهم شو قرأ و آخرته ينحبس من ورا بوستاته. و يا ويلك اذا كان مطّلع ع اخبار عالمية.

٦. مدير ديوان الخدمة

هو فعليا مش مدير، ولا بشتغل بديوان الخدمة. لكن بينزّل ٦٠٠ بوست باليوم لكل واحد بيدوِّر ع وظيفة. الحق يقال، هاد اكثر نوع مفيد من بين الجميع كونه العاطلين عن العمل للأسف مليانين البلد.

٧. شيخ من مشايخ الاردن

شاد ع حاله كثير. يا عمي، شيخ! مختار! يتميز هاد الشخص بلغته العربية الاردنية الاصيلة و بصدمك بأشعاره البليغة. بدك جاهة، فزعة، عطوة؟ هاد اللي رح يساعدك و يلبّيك وقت الشدة.

٨. المتديِّن

بغض النظر عن الديانة، هاد الشخص ما بينسّيك مخافة ربنا. انت بس توكل ع الله.

٩. اللقّاق

ابو الاشاعات. قاعد بيراقب و واقف بالمرصاد. ما في شي بيفوته. خذ حظرك من هالشخص و دير بالك لانه ناسي انه الحياة دوّارة، يوم الك و يوم عليك.

١٠. ابن بطوطة

هاد عايش بالمطار او عامل حاله عايش هيك. صورة جواز السفر و كاسة الستاربكس ما بتفارق صفحته. كل يوم ببلد بتبضّع او بتسلّق ع شجرة او بتأمّل بالبحر. المشكله اذا كان رياضي بطبيعته و بعرفله كم حركة يوغا. وين ما يروح بنبطِح ع راسه.

١١. اراغوز

الكوميدي اللي بيفطِّس الناس ضحك. دايما بينزل كومنتات حلوة و ”ميمز“ بتضحك. ضارب الدنيا بشلّوت.

١٢. اسامة السيد / منال العالم

الطباخ الماهر اللي بتحِفَك بتقنياته بالطبخ. بنسا انه العين بتاكل قبل التم و بينزّلك صور بتشهي او بتقرف. انت و حظك.