قوائم
سالي عوده
This article is also available in English. Switch Language

ما بتكون اردني مية من مية اذا ما عندك هالصفات

١. الكشرة

كتير معروفين بكشرتنا اللي عوجوهنا من وجه الصبح لاخر النهار بس صدقني مافي اطيب من قلبنا و روحنا الحلوة و المرحة. كل حدا فينا بصحى بيستني يوم الخميس على نار، طبعا ببلش الاحد و نحن منفكر بالخميس ايمتن رح يجي.

٢. اكل المنسف باليد

ما بتكون اردني ١٠٠٪ اذا ما دحبرت طابات المنسف بايديك و وصل الجميد للكوع. مع احترامنا الكبير للناس اللي بيوكلو المنسف بالشوكة و السكين.

٣. حب الضيافة

من نحن و زغار تربينا عل مبدأ انه المفتاح ضاع عشان اللي عنا ما يروحو، وياما منتخانق مع اللي بيجوا يزورونا يوم و يومين ومنخليهم يسحبوها ايام و اسابيع كتار.

٤. طلعة يوم الخميس

من نحنا وبالمدرسة منخترع قصص و حجج لاهالينا مشان نطلع مع اصحابنا بحجة انه خلصنا دروسنا وواجباتنا لحتى صرنا بالجامعة. صرنا كبار والعادة كبرت معنا. ممكن تفهموا قصدي اكتر من العجقة اللي بتصير مسا الخميس.

٥. صبحية الستات الصبح

بالمختصر اذا ضيعت امك يا رح تلاقيها عند الجارة اللي فوقك او عند الجارة اللي جنبك. ما بيقدروا امهاتنا يبلشوا نهارهم قبل ما يصبحوا على الجارة و تسحب معهم القعدة هني و بحكوا عن هاي وهديك.

٦. انتظار الثلج

خصوصا بهالوقت من السنه قديش منستنى الاخبار او الطقس يحكولنا انه في تلج، طبعا نحن ما منصدق نسمع انه في عاصفة عشان نعطل. وتسحب القعدة معنا على بطاطا حلوة، كستنا، سحلب… وهات تنحف اللي نصحته بهاليومين. ويا ويل الارصاد الجوية اذا ما تلجت.